സങ്കടനാശന ഗണേശ സ്തോത്രം - Sankata Nasana Ganesha Stotram
ശ്രീഗണേശായ നമഃ | നാരദ ഉവാച |
പ്രണമ്യ ശിരസാ ദേവം ഗൗരീപുത്രം വിനായകം |
ഭക്താവാസം സ്മരേന്നിത്യമായുഃകാമാർഥസിദ്ധയേ || 1||
പ്രഥമം വക്രതുണ്ഡം ച ഏകദന്തം ദ്വിതീയകം |
തൃതീയം കൃഷ്ണപിംഗാക്ഷം ഗജവക്ത്രം ചതുർഥകം || 2||
ലംബോദരം പഞ്ചമം ച ഷഷ്ഠം വികടമേവ ച |
സപ്തമം വിഘ്നരാജേന്ദ്രം ധൂമ്രവർണം തഥാഷ്ടമം || 3||
നവമം ഭാലചന്ദ്രം ച ദശമം തു വിനായകം |
ഏകാദശം ഗണപതിം ദ്വാദശം തു ഗജാനനം || 4||
ദ്വാദശൈതാനി നാമാനി ത്രിസന്ധ്യം യഃ പഠേന്നരഃ |
ന ച വിഘ്നഭയം തസ്യ സർവസിദ്ധികരഃ പ്രഭുഃ || 5||
വിദ്യാർഥീ ലഭതേ വിദ്യാം ധനാർഥീ ലഭതേ ധനം |
പുത്രാർഥീ ലഭതേ പുത്രാന്മോക്ഷാർഥീ ലഭതേ ഗതിം || 6||
ജപേദ്ഗണപതിസ്തോത്രം ഷഡ്ഭിർമാസൈഃ ഫലം ലഭേത് |
സംവത്സരേണ സിദ്ധിം ച ലഭതേ നാത്ര സംശയഃ || 7||
അഷ്ടഭ്യോ ബ്രാഹ്മണേഭ്യശ്ച ലിഖിത്വാ യഃ സമർപയേത് |
തസ്യ വിദ്യാ ഭവേത്സർവാ ഗണേശസ്യ പ്രസാദതഃ || 8||
|| ഇതി ശ്രീ നാരദപുരാണേ സങ്കടനാശനം ഗണേശസ്തോത്രം സമ്പൂർണം ||